<<Retour

Source : Bulletin SHAP, tome XXX (1903) pp. 275-276.

DOMME (1).

(1495)

Nous Léonard Prouhet, licencié ez droys, seigneur de Feyrac, conseiller du Roy noustre sire et lieutenant-général de noble et puissant seigneur monseigneur le Seneschal de Perigort, ensemble le procureur substitut du Roy en lad. seneschaussée de Perigort, les consuls et aulcuns des manans et habitans de la ville de Domme, nous sommes transportés au chasteau de Domme nommé la Vistor ; lequel est dehors lad. ville de Domme, appelle avecques nous noble homme Pierre de Meille, trésorier pour led. seigneur en lad seneschaussée de Perigort, et pour ce que cest la plus forte place qui soit de par deçà, et laquelle a mestier de bonne et seure garde et a aussi besoing de plusieurs réparations, avons enjoinct et commandé faire aud. tresourier une petite tour devers lad. ville de Domme, au bout de la muraille de la faulce braye nouvellement faicte, qui est dessoubs la Tour nommée de la Vistor, de la aulteur hors terre pour cette année tant seulement neuf à dix piés. Et pour ce que auprès de la pourte principalle dud. chasteau, avoit un grant rouchier par lequel on eut peu eschaler et prandre led. chasteau aisément, par ce que les murs d'icelluy sont bas aud. endroict, luy avons engoinct aussy faire picquer led. roc quest entre la muraille dud. chasteau et lad. Faulce braye ; et luy avons aussy enjoinct fere parachever la muraille de lad. faulce braye afin quil vint joindre a un autre grand roc qui est soubs une autre petite tourrete nouvellement faicte aud. chasteau, joignant à la muraille dud chasteau, laquelle muraille sera aulte environ quatre brasses et longue environ douze brasses, en laquelle muraille aura une grant pourte qui est la seurté de lad. place devers la venue de Senac,

Et après le huictiesme jour de jung, lan mil quatre cens quatre vingts et quinze, a la instance et requeste dud. Pierre de Meille, trésorier susd. nous, ensemble le procureur du Roy, greffier de lad. Court, appelles avecques nous lesd. consuls de Domme, Jehan de Martin, Pierre las Martias, Jehan de Bosquet, escuiers, et aultres de lad. ville de Domme, nous sommes transportés aud. chasteau voir si les réparations dessus dictes estoient parachevées, ainsi quil est dessus dict, et avons trouvé le tout faict et parachevé ; lesquelles réparations ont cousté aud. trésorier et aux maistres ouvriers les ungs la presens et ouy led. Meille par serment Raoux Baroussa, maistre ouvrier de lad. besoigne, veu aussy et leu les comptes dud. tresourier, et aussy pour ce quil nous a demeuré et apparu des paiyements faicts et parachevés, avons trouvé que led. trésorier a payé et despandu a fere lesd. réparations tant a bastir lad. tour, rompre et a picquer led. roc que faire lad. muraille et pourte de lad. faulce braye. comprins aussy les archières et canonnières que a faire pourter et avoir sept vingts charges de chaulz que faire pourter le sable et eaux pour ce que est en mauvais partrait en aulte montaigne que en despenses que en arlemens la somme de neuf vingts seize livres dix huict sols tournois ; et pour ce supplions à messieurs des Comptes et tresouriers de France que icelle somme de neuf vingts seize livres dix huict sols leur plaise alouer et compter aud. Pierre de Meille et icelle somme rebattre de sa recepte, en portant ces présentes dessoubs signées de nostre main, du procureur du Roy et du greffier dessoubs escripts, scellées du scel royal estably au presant siège de Domme, led. huictiesme jour du moys de Jung, an susd. mil quatre cents quatre vingts et quinze.

Léo. Prouhet,                                  Dubrueil,

lieut. gen. Susd.                                  greffier du commandement de mond. sieur Mr le lieutenant.

 

De Meyrinhac, proc. royal susd.

 

Pour copie conforme : A. de ROUMEJOUX.

(1) Bibliothèque nationale, Fonds français, manuscrits n° 22, 422, - Pièce cotée 49.