ENQUÊTE sur le pillage de la commanderie de Saint-Antoine-lès-Aubeterre
par les Huguenots (8 Décembre 1562).
______________________________
Archives du département de la Vienne : Commanderie de Saint-Antoine-lès-Aubeterre,
H. 3, liasse 1053. Copie originale sur papier (28 feuillets). Communiqué par
M.Reidet, archiviste de la Vienne.
______________________________
Information
secrette faicte au lieu et ville d'Aulbeterre par moy Jehan Caillaud, sergent
royal, au peys et duché d'Angoumois, ayant avecq moy pour adjoint Bernard
Dutilhet, praticien en court laye, et ce à la requeste de frère Arthemy
Bardeau, comme procureur de frère Jehan Degion, commendeur de la commenderie de
Sainct Anthoyne lès Aulbeterre, et en vertu de certain mendement esmané de monsieur
lieutenant general d'Angoumoys, en dacte du dix huictiesme de novembre mil cinq
centz soixante deulx, signé Arnauld; la présente information faicte comme
s'ensuyt, l'ung tesmoing après l'aultre, le vingt deulxiesme jour de novembre
mil cinq centz soixante deulx.
Maistre Mathurin
Robin, notaire soubz le seel de la conté de Périgort, demeurant au lieu et
bourg de Sainct-Anthoyne près Aulbeterre, eagé de trente deulx ans ou environ,
adjourné par led. Cailhaud, sergent royal pour depposer de véritté ; lequel
moyennent serment par luy faict aulx saincts evangilles Nostre Seigneur, le
livre touché, dict, sur ce interrogé, que au moys de may dernier passé, et le
treziesme jour dudit moys, il estoyt audit lieu de Saint-Anthoyne ; auquel lieu
surviendrent certain grand nombre de gendarmes tent à pied que à cheval, qui estoient
conduictz, comme il a oy dire, par ung nommé le capitaine Chanterrac, et estans
lesd. compaignees arivés aud. lieu,
il vit et fut presant que partie de lad. gendarmerie,
qui estoient de la nouvelle sexte et relligion appellée Huguenaulx, entrarent
en l'église dud. Sainct-Anthoyne, et estans en icelle ilz rompirent,
desmolirent entièrement les chapelles, autelz et aultres choses qui y estoyent,
ensamble les vitreaulx et vittres qui estoyent autour de lad. église, et non contans de ce prindrent lesd. Huguenaulx les
ymanges, hornemens de lad. église, comme chappelles,
chaisibles, cortibaulx, qui estoyent en lad. église en
grand quantitlé, des hornemens qui servoient à faire le service divin, ensemble
les livres qui estoyent en nombre environ une douzaine, escriptz en parchemin,
et iceulx geestarent avecq lesd. hornementz dedans ung
feu qu'ilz avoient faict au devant de lad. église, et illec firent brusler
lesd. choses ensamble. Vu que lesd. volleurs n'estant
resaziés de leur raige entrèrent en la commanderie et maison de monastère qui
est adjassante a icelle, en laquelle estans ilz commençarent à rompre
entièrement tous les coffres, lictz, chalitz, dressoirs, tables, chaises et
aultres meubles qui y estoyent, et iceulx, queque soit partie, firent brusler
dedans led. feu; allarent au cellier de lad. commanderie et iilec estant., à la persuasion et solicitation
de Guilhaume Gurnauld, barbier, Marc de Villedieu, Perrin du Breuilh, filz de
Bloys, Massé Dubreuilh, Perrine Guilhet, femme de Jehan Gurusset, Margueritte
Grand, femme de Pierre Recusset, Pasquet Cousturier et sa femme Mariette
Parunaud, Jehan Pourcherat, fillacier, Anne Durand et sa femme Jehanne Gugnier
et une qui demeure en la maison de Jehan Deschamps dud. Sainct-Anthoyne, Thonye
Sire, Jehanne Esboard, Margueritte Desmer, Mathurin Porcherat, Pierre Panyet,
Laurent Brun dict Biarneys, Mathurin Charruelh, l'aisné, Margueritte Moreau,
Pierre Poussauld, Françoyse Rousseau et Cosme Malangin, son filz; tous
lesqueulx nomès, en favorisant lesd. scedicieulx à
leur entreprinse, prindrent et emportèrent de lad. commenderie
tout le vin qui y estoyt, qui estoyt environ huit ou neuf barricques de vin de
nombre; lequel vin, lesd. nommés emportoient et charrioient
avecq brocz et aultres instrumens, et aussi emportoyent tous les aultres
meubles de lad. commanderie et les sarroient et
resseloient en leur maison, et mesmes y resselarent, comme aussi faict ung
nommé Guilhaume Durand, et emportaient avecq sactz tout le bled qui estoyt en
lad. commenderie, qui estoyt en nombre, en tout, tent
de bled froment que aultres grossailhes, de vingt pippes ou environ, et icelluy
bled emportoient en leurs maisons et retiroient et recelloient ceulx desd. gens d'armes qui y en voulloient porter(1), mesmes lesd.
Pierre Recusset et Jehan Mallangin, mary de lad. Rousseau; et recelloient aussi
tous les aultres meubles, comme lard, pain, touailles, serviettes et aultres
meubles, qui sortoient et resmuoient de lad. commanderie
ou partie d'iceulx, laquelle advent estoyt bien richement garnie de meubles et
utisensilles. Et vit aussi que les susd. Huguenaulx prindrent tous les tiltres
et contractz qui estoyent en lad. commanderie, en
grand et beau nombre, et iceulx rompirent et jectarent dans led. feu avecq plainctz sacz, et se bruslarent la pluspart. Et
dict que n'eust esté les susd. nommez, lesd. gens d'armes n'eussent faict la moictié dud. dommaige qui fut faict en lad. commenderie.
Et en ont lesd. recelleurs faict despuys leurs affaires
et besongnes beaucoupt mieulx qu'ilz n'avoient ne ne faisoyent auparavant. Et
dict led. qui deppose que si lesd. choses
fussent estées siennes, il ne vouldroit avoir souffert led. dommaige
pour deulx mil escuctz; et pour lad. somme ne se
sçauroyent reparer ne restorer en leur estât lesd. choses
gastées et destruictes. Et plus n'en dict deuhement interogé. Ainsi signé : M.
Robin, pour avoir depposé ce que dessus.
Jehan Eslard,
laboureur, demeurant au lieu de Sainct-Anthoyne, eagé de quarente huict ans,
adjourné pour depposer de veritté par led. Gailhaud, sergent; ce qu'il a promis
et juré faire par foy et serment de son corps faict sur les sainctz évangilles
Nostre Seigneur, le livre touché ; lequel sur ce interrogé, dict et deppose que
au moys de may derrier passé, luy estant en la commenderie de Sainct-Anthoyne,
survint aud. bourg une grande compaignie de gendarmes,
tent à pied que à cheval, ne sçaict led. qui deppose
qui les conduisoyt. Lesqueulx estans arrivés aud. lieu
entrèrent dedans l'église, en laquelle estans, ilz rompirent et desmolirent
entièrement tous les hostelz qui estoient en icelle et les chappelles, et par
amprès firent ung grand feu au devant d'icelle église, dans lequel ilz
jectarent tous les ymages, ornementz d'église et livres qui estoyent en lad. église en grand nombre, lesd. livres
escriptz en parchemin, et le tout firent brusler. Et non contanctz de ce
entrarent dedans le monastère et commanderie dud. Sainct-Anthoyne, auquel lieu
estant ilz rompirent et gasterent la plus grand part des meubles qui estoyent
en icelle ; et l'aultre part, comme bled, vin, lard, huile et linge, fut
desrobée et emportée par lesd. gendarmes et aultres du
bourg que led. qui deppose ne congnoist, fors ung
nommé Pasquet Cousturier, fornier, qui emporta de lad. commenderie
deulx fort beaulx lardz; ne sçaict led. qui deppose ou
il les porta. Et vit aussi que Jehanne Senne, femme de Jannot Moreau, emporta
en la maison de Pierre Recusset dud. Sainct-Anthoyne ung aultre lard antier. Et
dict qu'il fut prins et desrobbé dedans lad. commenderie
quarente pippes de bledz et huict barricques de vin ; sept lardz entiers et
certaine grand quantitté d'huylle et gresse qui restoyent aud. couvent, et par ampres ne si trouva poinct. Et dict que pour
deulx mil cinq cenlz escutz il ne vouldroict avoir souffert led. dommaige, si lesd. choses heussent
estées siennes; mesmes pour le regard des tiltres qui estoient en lad. commenderie, qui furent presques tous rompus et bruslés,
lesquelz cstoyent en fort beau nombre. Et plus n'en dict sur ce interrogé, fors
que si les gens dud. Sainct-Anthoyne, quequessoit partie d'iceulx, n'eussent
poinct aydé et favorisé lesd. gendarmes, il n'eust esté
faict tent de dommaige en lad. commenderie de la
moictié qu'il fut faict.
(Suivent trois autres dispositions
qui diffèrent peu des deux ci-dessus transcrites.)
Le procureur
du Roy requiert provision de prinse de corps contre Guilhaume Gurnaud, barbier,
Macé Devilledieu, Perrin Dubreuilh, fîlz de Blays, Macé Dubreuilh, ung nommé
Pasquet Cousturier, Jehan Porcherat, fillacier, Anne Durand, Mathurin
Porcherat, Pierre Paniot, Laurans Brun dict Biarnes, Mathurin Chaureilh,
l'aisné, Pierre Foussard, Cosme Mallengin ; et d'adjournement personnel contre
ung nommée Guillet, femme de Jehan Gurusset, Margueritte Grand, femme de Pierre
Recusset, la femme dud. Pasquet Cousturier, Mariette Perronnaud, la femme dud.
Durant, Jehanne Guynier, Thonye Sire, Jehanne Esbrard, Margueritte Desmer,
Guilhemette Moreau, et Françoys Rousseau, pour respondre à ses conclusions et de
frère Jehan Degion, commendeur de la commenderie d'Aulbeterre.
Faict à
Angoulesme ce huictiesme jour de décembre mil cinq centz soixante deulx.
Ainsi signé : De Corlieu.
Soyt faict comme il est
requis. Signé : Ythier, greffier.
(1) La déposition suivante s'exprime ainsi
: « et recelaient entierement tout ce que par les susd. gens
d'armes et Huguenaulx leur estoit porté en leurs maisons, sans en faire aulcune
difficulté. »