Johannes - Dei gratia Francorum Rex, notum facimus universis presentibus et futuris, quod exposito nobis nuper ex

parte Guillemete dicte Latubee, quod ipsa nuper capta pro suspicione quorumdam criminum que imponebantur

eidem se commisisse et carceribus nostris Castelleti[1] nostri Parisius intrusa, confessa fuit, quod ad suggestionem

quarumdem mulierum quas consulta fuerat super hoc, ut amor, quo ipsa et Reginaldus dictus de Charronne se

adinvicem diligebant, cresceret et caleret inter eos. Ipsa, ad cimiterium Sanctorum Innocentum Parisius accedens, unum

os cuiusdem cadaveris seu mortui hominis ceperat et secum detulerat et delatum in ignem posuerat et coniuraverat

ex parte patris, matris, fratrum et sororum suorum obsecrans, ut, sicut illud os ardore ignis calebat ibidem

et comburebat, arderet et caleret cor dicti Reginaldi mariti sui, ut cito ad ipsum accederet et reverteretur

et quod hoc quadragies vel ultra fecerat quod cum ad suum propositum dixerat sibi annime(?) profuisse, quodque

tot vicibus vel ultra, sal ceperat et in palma posuerat et seputo[2] seu salive sue commiscuerat, et commista

insimul in ignem ut prius posuerat, verba predicta, vel similia et ad finem et intentionem predictas, dicens

et asserens quod sibi sentiit prout tenet prout tenet firmiter profuisse. Item et quod a nundinis de Landico( ?)

ultimo preteritis fuit annus elapsus citra, ipsa, per suggestionem simulem, duos pedes talpe dexteri

lateris secum tulit ut inde fortunium melius et prosperos eventus hereret. Propter que dicta Guillemeta

adhuc dictis carceribus detinetur, dictus que Reginaldus, qui summelarius est ma(p)parum carissimi fratris

nostri, ducis Aurelianensis nobis humiliter supplicavit, ut cum ipsa detenta fuerit hactenus bone fame

et bene vite et honeste conversationis et absque labe alterius criminis cuiuscumque nos eidem super hoc

dignemur gratiam impartiri, nos igitur, attentis premissis et contemplatione dicti fratris nostri cui dictus

Reginaldus famulatur, ut predicitur, supplicationi huiusmodi annuentes penam criminalem, quam ipsa

Guillemeta erga nos propter hoc potuit incurrisse, commitamus de speciali gratia, auctoritate nostra regia, et

nostre plenitudine potestatis tenore presentium in civilem penam et emendam, de quasiquidem emenda,

eadem Guillemeta satisfactionem iam fecit et exhibuit competentem, qua mediante ipsam ad suam famam

et bona restituimus per presentes, mandantes preposito Parisius, vel eius locum tenente, quathenus ipsam a

carceribus predictis liberet, et ipsos exire permittat impune, eidemque preposito, ceterisque justiciariis

nostris, presentibus et futuris, vel eorum loca tenentibus et eorum cuilibet ut ad eum pertinuerit, quathenus dictam

Guillemetam nostra presenti gratia uti faciant et gaudere, non molestantes vel molestari permittentes

eamdem ob facta et delicta huiusmodi in contrarium quoquomodo, et bona sua, si que occasione premissorum

capta vel detenta fuerint, eidem restituant indilate. Quod ut firmum et stabile perpetuo perse-

-veret, nostrum presentibus litteris sigillum est appensum, salvo in aliis jure nostro et in omnibus quolibet

alieno. Datum Parisius sexta die augusti, anno Domini millesimo CCC° quinquagesimo quarto.

Per Regem. Yvo.